Ætlar Spaugstofan á þing?

"Spaugstofan hefur boðað til blaðamannafundar eftir hádegið í Þjóðmenningarhúsinu"

Miðað við val á fundarstað og í ljósi velgengni starfsbróðurs þeirra Spaugstofumanna í nýafstöðnum sveitarstjórnarkosningum, þá hlýtur tilgangurinn með fundinum að vera augljós: Auðvitað verður tilkynnt um stofnun nýs stjórnmálaflokks undir merkjum Spaugstofunnar, með því markmiði að bjóða fram til Alþingis. Enda er núverandi stjórnarsamstarf komið að fótum fram og aðeins tímaspursmál hvenær boðað verður til kosninga á næstu misserum. Þeir Karl Ágúst, Pálmi, Sigurður og Örn yrðu klárlega ekki verri en núverandi "leiðtogar" og í öllu falli miklu skemmtilegri!

 

Spaugstofan boðar til blaðamannafundar

Frumtexti greinarinnar hér (enska)

Norski lögfræðiprófessorinn Peter Ørebech segir í Morgunblaðsgrein að íslenska ríkið megi einfaldlega ekki borga tjón IceSave innstæðueigenda. Er þetta í samræmi við álit flestra sem hafa kynnt sér málið í þaula og eru ekki litaðir af Evrópudýrkun í málflutningi sínum. Hér má finna frumtexta greinarinnar á ensku:

The Icesave bank of Iceland; from rock-solid to volcano hot

Segir Ísland ekki mega borga fyrir Icesave

Georg Bjarnfreðarson?

Steingrímur J. Sigfússon, fjármálaráðherra, segist telja að um misskilning sé að ræða hjá Jóni Bjarnasyni, sjávarútvegs- og landbúnaðarráðherra, um að aðlögunarferlið að Evrópusambandinu sé hafið.

Getur verið að það sé Steingrímur sem er að misskilja? Í það minnsta hlýtur nýkjörnum borgarstjóra Reykjavíkur að þykja þetta ákaflega vel að orði komist!

Telur að um misskilning sé að ræða

Svíkur Gylfi gefin loforð?

Ég er enn að bíða eftir því að Gylfi Magnússon viðskiptaráðherra efni loforð sem hann gaf mér á borgarafundi 28. júní um að fylgja því eftir hvers vegna FME hefur látið og lætur enn afskiptalaust að fjármögnunarfyrirtæki þverbrjóti starfsleyfi sín og þær takmarkanir sem þar eru settar. En það er kannski ekki við öðru að búast, því eins og Þórdís Björk Sigurþórsdóttir bendir á í pistli sínum sat Gylfi í stjórn Samtaka Fjárfesta um árabil og er því tamt að gæta hagsmuna fjármagnsins gegn almenningi. Fyrir hrun var það svikabönkunum vel að skapi að hafa máttlaust Fjármálaeftirlit og núna tæpum tveimur árum síðar virðist enn vera það sama uppi á teningnum. Svarið við spurningunni sem ég lagði fyrir Gylfa á fundinum (”Hvað er í gangi í FME?”) er því líklega ennþá það sama: ”Ég veit það ekki!”.

Telja ráðherra ótrúverðugan

Jónína S. Lárusdóttir fv. ráðuneytisstjóri

Enn á ný er Jónína S. Lárusdóttir ráðuneytisstjóri í viðskiptaráðuneytinu komin í hringiðuna. Skemmst er að minnast aðkomu hennar að málefnum er varða innstæðutryggingar (IceSave) eins og tíundað er í skýrslu Rannsóknarnefndar Alþingis. Þá sat Jónína sem fulltrúi ráðuneytisins í "samráðshópi stjórnvalda um fjármálastöðugleika" í aðdraganda hrunsins, en árangursleysi þeirrar vinnu ætti að vera öllum ljóst. Í raun hafði ekki borist eitt einasta pappírssnifsi frá hópnum inn á borð ríkisstjórnar að sögn fyrrverandi ráðherra, og svo litlar spurnir voru af hinu meinta starfi að annar foringi stjórnarliðsins hafði jafnvel steingleymt því að hópurinn væri til.

Nú er komið á daginn að fyrir rúmu ári síðan fékk Jónína í hendur þrjú samhljóða minnisblöð með álitum lögfræðinga ráðuneytisins og Seðlabankans um ólögmæti gengistryggingar. Þrátt fyrir að þessi staða kallaði augljóslega á viðbrögð og undirbúning af hálfu ráðuneytisins vegna hugsanlegra afleiðinga fyrir hagsmuni ríkissjóðs, þá virðist Jónína hafa unnið markvisst að því að halda þeim leyndum innan þröngs hóps embættismanna. (Sjá prýðilega samantekt Þórðar Björns Sigurðssonar.) Af ummælum viðskiptaráðherra og fyrirliggjandi staðreyndum má helst draga þær ályktanir að Gylfi hafi annaðhvort tekið þátt í blekkingaleiknum, eða rétt eins og forvera hans verið haldið "úti í kuldanum". Hafa ýmsir kallað eftir ábyrgð ráðherrans í málinu og nú síðast hafa þingmenn Hreyfingarinnar skorað á Gylfa að segja af sér.

Aftur berast böndin að Jónínu. Hvort sem um ásetning eða hrein afglöp er að ræða, þá er það orðið endurtekið munstur að stór mál sem hún kemur nálægt verða að hinu mesta klúðri. Hún hefur nú látið af störfum í ráðuneytinu og verið ráðin framkvæmdastjóri lögfræðisviðs Arion banka (inn og út um gluggann...) en þar mun hún væntanlega hafa yfirumsjón með innheimtu, m.a. gengistryggðra lána. Verði bankanum og viðskiptavinum hans að góðu. Fyrir vikið þykjast starfsmenn ráðuneytisins nú ekki geta rakið það hverjum Jónína hafi sent afrit af títtnefndum minnisblöðum, og hverjum ekki. Þeir bera því við að búið sé að loka tölvupósthólfi hennar. Við eigum sem sagt að trúa því að þar með hafi allar eldri upplýsingar á póstþjóni ráðuneytisins gufað upp, og hvergi séu til varaafrit. *hóst* Kanntu annan betri?

Ráðuneytisstjóri hafði þrjú álit undir höndum