Kostnaður vegna Landsbankans fyrir utan IceSave

Menn hafa verið að leika sér með tölur um kostnað vegna IceSave, en í því gleymist oft kostnaðurinn við eiginfjárframlag ríkisins til nýja bankans ásamt gengistryggðu skuldabréfi NBI við skilanefndina sem ríkið þarf óbeint að greiða af sem eigandi bankans (afborganirnar teknar af mögulegum hagnaði á rekstri bankans sem kemur út á það sama og ef ríkið væri sjálft að borga það). Auk þess stendur til að kaupa til baka verðlausa pappíra frá Seðlabanka Luxembourg fyrir 185 milljarða (í Evrum!) til að leysa út eignir úr þrotabúi bankans sem þar er haldið í gíslingu, þessar eignir eru þó ekki metnar á nema "nokkra tugi milljarða" og verða teknar upp í IceSave kröfuna.

Samkvæmt fyrirliggjandi upplýsingum um yfirtöku ríkisins á innlendu starfseminni hef ég áætlað kostnað íslenskra skattgreiðenda eingöngu vegna Landsbankans eftirfarandi:

• 140 milljarða kaupverð ríkisins fyrir yfirtöku NBI hf. 
• 208 - 280 milljarða skuldsetning NBI (gagnvart skilanefnd)
• 100 - 185 milljarða lausnargjald fyrir pappíra í Luxembourg
• 80 milljarða veðlánatap Seðlabanka Íslands (repo viðskipti)

Samtals gera þetta á bilinu 528 - 685 milljarða króna úr vasa skattgreiðenda og athugið að það er fyrir utan hugsanlegan kostnað við ríkisábyrgð vegna IceSave, án tillits til vaxta og gengisáhættu. Á móti kemur reyndar eign sem er innlenda starfsemi Landsbankans, en þegar bankinn var einkavæddur á sínum tíma var sú eign metin á 25 milljarða, sem er minna en skekkjan í þessari ágiskun og innan við 5% af heildarkostnaðinum miðað við neðri mörkin!

Ég vek sérstaklega athygli á því að þessir upphæðir eru teknar beint úr vasa okkar skattgreiðenda,  og fara þaðan til annars vegar fjármagnseigenda sem áttu innstæður í Landsbankanum og hinsvegar til skilanefndarinnar og þaðan beint upp í IceSave kröfur Breta og Hollendinga. Þannig er það í raun og veru kaupsamningurinn milli ríkisins og skilanefndarinnar sem tryggir öðru fremur margumræddar "góðar endurheimtur" upp í tapaðar innstæður, sem er engu að síður á kostnað almennings. Með slíkum bókhaldsbrellum vil ég meina að búið sé að ríkisvæða bankann að fullu, þar með talið þau vinnubrögð sem þar hafa tíðkast fram að hruni! 

Það sem mér finnst samt einna merkilegast er að heildarkostnaður fyrir utan IceSave stefnir í að verða svipaður og áætlað var í fyrstu að IceSave myndi kosta, þannig að jafnvel þó að endurheimtist 100% upp í þá kröfu verða afleiðingarnar af hruni bankans afar dýrkeyptar.

Skuldaniðurfellingu fyrir Haiti !

Ég vil vekja athygli á undirskriftasöfnun sem efnt hefur verið til vegna hörmunganna í kjölfar jarðskjálftans á Haiti, með því markmiði að skora á þjóðir heims að fella niður erlendar skuldir Haitibúa. Ein af meginástæðum þess hversu mikið manntjón varð og hvers illa gengur að koma fólki til bjargar, eru gríðarlegar skuldir sem spilltir stjórnarherrar hafa í gegnum tíðina hlaðið á þjóðina með þeim afleiðingum að núna fara allir peningar í afborganir og ekkert er afgangs til að viðhalda nauðsynlegum grunnkerfum eins og vatnsveitu og rafmagni hvað þá einhverju sem kallast gæti velferðarkerfi. Þau kerfi sem vanalega er ætlað að grípa inn í við svona aðstæður eru einfaldlega ekki til staðar eða svo illa á sig komin að þau eru líka ónýt eftir skjálftann. Af landfræðilegum ástæðum er bara tímaspursmál hvenær næstu hamfarir verða á þessu svæði, hvort sem það er fellibylur eða jarðskjálfti, og eina leiðin til að koma í veg fyrir að svona harmleikur endurtaki sig er að þjóðin fái tækifæri til enduruppbyggingar. Það fær hún ekki á meðan allar tekjur eru hirtar af erlendum lánadrottnum. Í ljósi þeirrar kreppu sem geisar í efnahagskerfinu ættu þjóðir heims að líta á þetta sem víti til varnaðar um það sem getur gerst þegar misvönduð yfirvöld fá að komast upp með að skuldsetja þjóð sína fyrir allskonar vitleysu sem engu skilar, boðskapur sem íslenskri þjóð ætti að vera sérstaklega nærtækur um þessar mundir!

Lesa má meira um þetta og skrifa undir áskorunina á vefsíðunni Avaaz.org

Enn finnst maður á lífi

Er ekki lækkað lánshæfismat bara gott?

"Þýski bankinn Commerzbank segir að ... lækkun lánshæfiseinkunarinnar geti orðið til þess að takmarka fjárfestingarákvarðanir erlendra fjárfesta..."

Áður en við hrökkvum í kút yfir því skulum við rifja upp afrekaskrá þessara margumræddu "matsfyrirtækja":

• Nokkrum dögum áður en Enron spilaborgin hrundi gáfu öll "virtustu" matsfyrirtækin Enron hæstu lánshæfiseinkunn.
• Rétt áður en íslenska "fjármálaundrið" sprakk með háum hvelli gáfu þessi matsfyrirtæki íslensku bönkunum og ríkissjóði hæstu mögulega einkunn.
• Reyndar má rekja upphaf fjármálakreppunnar til þess að sömu matsfyrirtæki gáfu hæstu einkunn á svokölluð undirmálslánasöfn sem reyndust "eitruð" þegar upp var staðið.

Þannig að ef þau segja að við séum í rusli, þá hljótum við að vera á réttri leið!

Að lækka í einkunn er reyndar aldrei skemmtilegt, en lækkað lánshæfismat getur samt haft ýmsa kosti í för með sér:

• Möguleikar til erlendrar lántöku hverfa. Minni erlendar skuldir: frábært!
• Ef það endar með greiðslufalli, þá er bara því fyrr þeim mun betra, enda hafa rannsóknir sýnt fram á að það er hagkvæmasta leiðin til að koma fullvalda ríki út úr skuldakreppu.
• Hinsvegar er til nóg af krónum á Íslandi t.d. yfir þúsund milljarðar í bönkunum, það þarf bara að koma þeim á hreyfingu því peningar eru einskis virði nema þeir flæði um hjól efnahagslífsins. Skortur á erlendu lánsfé myndi skapa pressu á innlendar fjárfestingar í staðinn, sem gæti virkað eins og innspýting í atvinnulífið ef rétt er að málum staðið
• Jafnvel þó svartsýnustu spár rætist og við lendum í einhverskonar klípu vegna þess að við höfum tekið of miklar áhættur, þá er það bara lexía sem við þurfum að læra af, og veitir kannski ekki af?

Þetta lánshæfismat er ekkert til að hafa áhyggjur af því það er voða lítið að marka það. Við þurfum bara að hafa trú á sjálfum okkur, og hugsa vel um hvort annað eins og við getum.

Lækkun lánshæfiseinkunnar gæti orðið afdrifarík

Alþjóðleg undirskriftasöfnun hafin

Eins og kom fram í viðtali Alex Jones við Birgittu Jónsdóttur þingmann í fyrradag, þá hefur verið hleypt af stokkunum alþjóðlegri undirskriftasöfnun á netinu til stuðnings við málstað Íslendinga í IceSave deilunni við bresk og hollensk stjórnvöld.

Slóðin á undirskriftasöfnunina er: SaveThePeopleOfIceland.com

Leiddar hafa verið að því líkur að ef Íslendingar felli samninginn í þjóðaratkvæðagreiðslu geti það skapað mikilvægt fordæmi fyrir aðrar þjóðir sem eiga undir högg að sækja þar sem fjármála- og stjórnmálaöfl hafa sammælst um að þröngva tapi og skuldum einkafyrirtækja upp á skattgreiðendur. Ummæli á borð við "Við erum öll Íslendingar" bera vott um að vandamálið er ekki séríslenskt, sá stórfelldi þjófnaður og kúgun sem í þessu felst virðir engin landamæri. Það er því aðeins með víðtækri alþjóðlegri samstöðu sem almenningur getur reynt að snúa þessari þróun við. Víða um lönd er fólk tilbúið að rísa upp gegn fjármálaveldinu en er hikandi vegna þess að það vantar frumkvæði, við getum orðið þessu fólki mikilvæg hvatning og undirtektirnar hafa hingað til verið mjög jákvæðar í garð Íslands.

Fagna samstöðu um Icesave

Hræsnarinn Dominique Strauss-Kahn

Dominique Strauss-Kahn framkvæmdastjóri Alþjóðagjaldeyrissjóðsins lagði á það áherslu í gær að Íslendingar þyrftu að tryggja sér stuðning meirihluta þeirra ríkja sem eiga aðild að sjóðnum. Þessi ummæli vekja ekki síst athygli í ljósi þess að Strauss-Kahn var sjálfur einn af skýrsluhöfundum bankanefndar franska seðlabankans þar sem m.a. kom fram að  innstæðutryggingakerfi  í Evrópu væru EKKI gerð til að þola kerfishrun eins og varð hér á Íslandi.

Samt sem áður gengur hann erinda Breta og Hollendinga sem vilja láta okkur ábyrgjast tjónið langt umfram skyldur.

Á mínum æskuslóðum var svona lagað kallað hræsni !

Dominique Strauss-Kahn

Khan Noonien Singh

 

Íslendingar fá gusu frá AGS