Told you so - a long ago! Bye now.

„Cheney hefur skilning á orkumálum,“ sagði Ariel Cohen, sérfræðingur um Rússland hjá Heritage-stofnuninni í Washington, og bætti því við að „þetta snerist jafn mikið um flutningsleiðirnar [á olíu] frá austri til vesturs og um þá hernaðarlegu ógn sem væri til staðar“.

Vissulega hefur Dick Cheney afar góðan skilning á orkumálum, ekki síður en Páfinn í Róm hefur góðan skilning á trúmálum haha! Athyglisverðara þykir mér þó að þarna tekur sjálf Heritage Foundation undir með bofsinu að bramboltið í Georgíu snúist ekki síður um eldsneyti og "orkuöryggi" til jafns við þjóðernis- og landamæradeilur, en þeirri greiningu á atburðarásinni hélt ég einmitt hátt á bloggi á fyrstu dögum stríðsins. Þessi ferð Cheneys passar vel inn í það munstur enda er maðurinn fyrrverandi yfirmaður Halliburton, en dótturfyrirtæki þess eiga mikla hagsmuni undir samningum sem þeir hafa gert um uppbyggingu á bortækni o.fl. fyrir olíuvinnslu á Kaspíahafssvæðinu m.a. í Turkmenistan. Fyndið hvað þessir menn veigra sér ekki við að misnota embætti sín til að maka krókinn og ganga erinda velgjörðarmanna sinna, en auðvitað er það ávallt í þeim tilgangi að "tryggja" öryggi og velsæld okkar hér á vesturlöndum.

Hinsvegar er óvænt og afar ánægjuleg tilbreyting að stefnumótandi aðili (e. think-tank) eins og Heritage skuli segja svona opinskátt frá því hvað raunverulega liggur þarna að baki burtséð frá öllum áróðrinum sem á manni dynur. Vonandi fáum við meira af slíku framvegis þannig að einhverntímann verði kannski auðveldara fyrir fréttamenn að flytja innihaldsríkar og marktækar fréttir eins og þessa sem hér er tengt við, og við bloggarar getum jafnvel hætt að standa í þessari sjálfboðavinnu við að reyna að rýna gegnum gagnslausan og endalausan áróðurs-bull-"frétta"flutning. Ef svo væri hefði maður örugglega oftar eitthvað ánægjulegt til að segja frá eða myndi jafnvel gera eitthvað meira upplífgandi í staðinn, eins og t.d. að fara oftar út að hreyfa sig og njóta um leið íslenskrar náttúru... eða bara vera enn meira í faðmi fjölskyldunnar! ;)

Þessi færsla verður því mögulega með þeim síðustu sem hér munu birtast, í bili a.m.k. Ég stofnaði þessa bloggsíðu á sínum tíma með það fyrir augum að segja frá ýmsu sem mér fannst nauðsynlegt að sagt yrði frá en einhverra hluta vegna væri enginn annar að fjalla um, sérstaklega þeir fjölmiðlar sem reknir eru af fyrirtækjum og gera þ.a.l. aðallega bara það sem þarf til að skila hluthöfum sínum hagnaði. Með þessu vildi ég gefa lesendum kost á "annarskonar" nálgun og umfjöllun um ýmis mál sem annaðhvort var þagað um eða þá að umfjöllun á opinberum vettvangi var einfaldlega allt of einsleit til að gagnast neinum öðrum en þeim sem eiga dulinna hagsmuna að gæta og vildu helst geta fengið sínar fréttatilkynningar birtar óbreyttar eftir pöntun. Þar á meðal eru stjórnmálamenn margir auðvitað áberandi bæði hérlendir sem og erlendir, en ekki síður margir þeir sem hafa slíkan auð og völd að þeir geti haft umtalsverð áhrif á þjóðlífið og jafnvel söguna. Sjálfur er ég hvorki svo auðugur né voldugur að máli skipti í þessu samhengi, og verður því aldrei hægt að segja um greinaskrif mín að einhverjir hagmunir liggi þeim að baki aðrir en mínar eigin persónulegu skoðanir og áherslur. Nú eru hinsvegar raddirnar orðnar fleiri (eða þá að ég verð meira var við þær en áður) og sífellt fleiri eru farnir að þora að tala upphátt um hvað svo sem raunverulega er á seyði hverju sinni. Þegar mogginn og meira að segja Heritage Foundation eru farin að taka í sama streng og maður sjálfur þá er orðið hálf tilgangslaust að eyða tíma í að rannsaka og skrifa sínar eigin greinar um sömu mál. Það er eiginlega orðið óverjandi nema e.t.v. einhver vilji ráða mig í vinnu við það, sem kæmi reyndar fyllilega til greina af minni hálfu ef einhver er áhugasamur og vantar greinaskrifara með reynslu! Ég ætla þó ekki að loka síðunni, þvert á móti vil ég leyfa henni að standa í óbreyttri mynd sem lengst, og mun e.t.v. detta inn endrum og sinnum með styttri athugasemdir og jafnvel fara með gamanmál ef því er að skipta.

 Að lokum óska ég þess sem fyrr að lesendur nær og fjær lifi sem lengst heilir og sælir! 

Og munið: ég kem aftur... ég kem alltaf aftur! 

Stappar stálinu í Georgíumenn