Í tilefni dagsins - 3. hluti: SÖKKÖMB

SØKKØMB er ný og hagkvæm lausn, sérhönnuð fyrir sjálfskipað áhugafólk um beint réttlæti.

Ertu fullur orku? Hefurðu stundum meira á þinni könnu en þú ræður við? Verðurðu sífellt reiðari vegna yfirgangs bankastjóra, innheimtumanna þeirra og annara glæpamanna? Viltu útrýma skipulagðri glæpastarfsemi úr þinni heimabyggð?

Nútíminn gerir sífellt meiri kröfur um hraðvirkar og árangursríkar lausnir, og nú gefst þér tækifæri til að tryggja öryggi þitt og fjölskyldu þinnar með einni slíkri. Þegar öll fjölskyldan hjálpast að við að setja SØKKØMB fallöxina saman heima í stofu muntu finna innri frið er þú hugsar til þess að refsingin muni framvegis verða í samræmi við afbrotið. Í vernduðu friðhelgi heimilisins munt þú nú taka völdin aftur í þínar hendur og verða eigin húsbóndi á ný.

SØKKØMB er framleidd úr gegnheilli stafafuru og útbúin með sterkbyggðu blaði úr ryðfríu stáli. Hún er létt, fyriferðarlítil (tekur aðeins hálfs fermetra gólfpláss samansett), endingargóð, og hefur verið ítarlega þolpróuð við raunverulegar aðstæður! Rétt eins og allar okkar vörur fylgir henni þriggja ára verksmiðjuábyrgð m.v. heimilisnotkun (allt að 100 skipti á dag).

 

     Verð: aðeins €99,-

Skrúfur, festingar, samsetningaráhöld og leiðbeiningar innifalin. 

Í tilefni dagsins - 2. hluti: skuldhreinsivél

Ný vara birtist í vefverslun ELKO í dag og vakti athygli. WE-SAVE-U skuldhreinsivélin

Engum sögum fer af því hversu margar pantanir hafi borist en fyrirfram hefði ég búist við að eftirspurnin væri umtalsverð hér á landi. Miðað við ástandið á Írlandi held ég hinsvegar að þeim muni ekki duga svona smáskammtalækningar, heldur neyðist þeir til að yfirbyggja landið í heild og breyta því í stóra skuldahreinsiverksmiðju. Í framtíðinni þegar þeir hafa náð góðum tökum á skuldahreinsun gæti það orðið stór þáttur í útflutningi því þá verður komin eftirspurn t.d. í Portúgal, Spáni, Bandaríkjunum, og víðar þar sem skuldsetning hefur náð yfirhöndinni.

Í tilefni dagsins - 1. hluti: svartháfur

Mér duttu allar lýs dauðar úr höfði er ég leit forsíðu Fréttablaðsins í dag, en þar blasti við frétt um ráðleggingar Íslandsmethafans í tapreksti meðalstórra fjármálafyrirtækja varðandi IceSave. Það er með ólíkindum hvernig blaðamanninum tókst að fjalla að því er virtist af fúlustu alvöru um þá meintu ráðgjöf að stærsta myntkörfulántaka Íslandssögunnar sé nauðsynleg forsenda frekari skuldsetningar, og að í því felist einhver lausn á vanda sem stafar af of miklum skuldum.

Svo leit ég á dagatalið og ástæða þessara öfugmæla rann upp fyrir mér.

Enginn fjölmiðill mun samt toppa í dag það sem þakti heilsíðu í Mogganum. Það skelfir mig að einhver gangi laus þarna úti með dómgreind þá sem ráðstafaði hér um bil bílverði í birtingu á þessu furðuverki. Sem andstæðingur ríkisábyrgðar á ókind þessari vil ég þó koma á framfæri þökkum til Áfram hópsins fyrir að hjálpa fólki að ákveða sig.

  Hákarlinn á myndinn er talinn vera af tegundinni Svartháfur.

Væri ég í einni sæng með honum myndi ég líka þrá að komast undan henni.

Fornleifar í Landeyjahöfn

Hagsmunasamtök Heimilanna kjósa nýja stjórn

Í gærkvöldi var haldin aðalfundur í Hagsmunasamtökum Heimalanna þar sem meðal annars var kjörin ný stjórn. Sá er þetta ritar hefur verið óvirkur félagi í samtökunum frá því skömmu eftir stofnun þeirra en ákvað í þetta sinn að mæta á aðalfund, og skemmst frá því að segja endaði sem 2. varamaður stjórnar að kosningu lokinni. Þetta var að sjálfsögðu ánægjulegt, ég hlakka til að fylgjast með því verðuga starfi sem þarna er unnið og leyfa tímanum að leiða í ljós hvað ég geti lagt til góðra verka þegar fram líða stundir. Fráfarandi stjórnarmönnum kann ég miklar þakkir fyrir vel unnin störf.

Hagsmunasamtök Heimilanna

Ályktun um húsnæðismál, afnám verðtryggingar og leiðréttingar lána
Aðalfundur Hagsmunasamtaka heimilanna 31. mars 2011

Undanfarna áratugi hafa hafa heimilin í landinu liðið fyrir að fjármögnun húsnæðis hefur verið í nær stöðugu uppnámi vegna ofurvaxta og verðtrygginar sem margfalda húsnæðiskostnað almennings. Húsnæði er grunnþörf sem samfélagið verður að tryggja aðgang allra að. Skortur er á félagslegum úrræðum í húsnæðismálum og framboð leiguhúsnæðis er takmarkað á sumum svæðum.

Vegna þessa hefur fólk átt fárra annarra kosta völ en að kaupa húsnæði, mest með verðtryggðum jafngreiðslulánum. Slík kjör eru blekking frá upphafi, ógegnsætt kerfi sem fleytir ófyrirséðum kostnaði hagstjórnarmistaka og afleiðingum óábyrgrar útlánastarfsemi fjármálafyrirtækja yfir á lántaka, sem einir bera áhættuna. Þannig hefur stökkbreyttur höfuðstóll, verðtrygging og okurvaxtakrafa hangið eins og fjárkúgun yfir íslenskum almenningi.

Í meira en þrjá áratugi hefur verðtrygging lána verið notuð til að halda uppi háum raunvöxtum á kostnað almennings. Verðtryggingin hefur átt þátt í að auka verðbólguna með vítahringsáhrifum og þannig aukið á kjaraskerðingu allra og stöðuga eignatilfærslu, auk þess sem eignaupptaka sem í henni felst kann að brjóta í bága við stjórnarskrá. Þetta íslenska kerfi er bein ógn við fjármálastöðuleika í landinu og verður að afnema.

Losa þarf íslenskan almenning undan þessu oki og opna leiðir fyrir fleiri valkosti í húsnæðismálum, svo sem fjölbreytt óverðtryggð lán án núverandi okurvaxtaákvæða auk fleiri möguleika til búsetu, til dæmis tryggt leiguhúsnæði, búsetahúsnæði og félagslegt húsnæði á sanngjörnu verði. Þannig hafa íslensk heimili loksins sambærilegar aðstæður og öryggi og nágrannaþjóðir okkar í húsnæðis- og lánamálum.

Aðalfundur Hagsmunasamtaka heimilanna skorar á Alþingi að tryggja afnám verðtryggingar á árinu 2011 á meðan verðbólgan er lág. Skapa þannig lífvænlegri fjármögnunarskilyrði fyrir heimilin og atvinnulífið í landinu og tryggja að þeim verði mögulegt að taka þátt í enduruppbyggingu íslenska efnahagskerfisins.

Aðalfundurinn krefst þess að höfuðstóll verð- og gengistryggðra lána verði tafarlaust leiðréttur með almennum hætti, sem er öllum aðilum í samfélaginu til hagsbóta til lengri tíma litið.

Þjóðin verður að snúa vörn í sókn og knýja með samstöðu fram nýja umgjörð um fjármögnun íbúðarhúsnæðis sem ekki gengur út á að féfletta almenning á Íslandi.

Tvímælalaust: NEI við IceSave

Í þessu atriði úr þættinum Tvímælalaust, sem hefur farið eins og eldur í sinu um netheima, útskýra þeir félagar Pétur Jóhann Sigfússon, Þorsteinn Gunnarsson og Karl Berndsen í frekar einföldu en auðskiljanlegu máli afstöðu sína til IceSave.

 

Hér er svo hægt að horfa á Jón Helga Egilsson í Silfri Egils.