Vatn hefur fundist á tunglinu!

Times segir frá því að indverskt tunglkönnunarfar hafi fundið í fyrsta skipti sannanir þess að vatn sé að finna í umtalsverðum mæli á tunglinu. Upplýsingar um þetta komu frá mælitæki á vegum NASA, geimferðastofnunar Bandaríkjanna, um borð í ómannaða könnunarfarinu Chandrayaan-1 sem indverska geimrannsóknastofnunin sendi á braut um tunglið í október á síðasta ári. Þessi uppgötvun er talin geta markað tímamót í sögu geimrannsókna, og jafnvel opna fyrir þann möguleika að reist verði geimstöð á tunglinu innan fárra áratuga. Aðgengi að vatni hefur einmitt verið talin ein af meginforsendum næstu skrefa í mönnuðum geimferðum. Auk ummerkja um tilvist vatns fundust óvæntar vísbendingar um að vatn kynni ennþá að vera að myndast á tunglinu, og að þar væri einnig að finna vetni sem hugsanlega mætti nota sem eldsneyti til frekari geimkönnunar.

Þann 9. október nk. mun svo annað geimfar á vegum NASA sleppa fargi sem ætlað er að brotlenda í djúpum gíg nálægt suðurpól tunglsins þar sem ávallt er skuggi og því mjög lágt hitastig. Við höggið er búist við að talsvert af efni og jafnvel ís muni þyrlast upp sem hægt verði að skoða nánar frá jörðu með sjónaukum og öðrum störnuskoðunartækjum. Þrátt fyrir að þessi aðferð sé ekki óumdeild og myndi hæglega flokkast undir "náttúruspjöll"ef þetta væri gert á jörðinni, þá verður engu að síður forvitnilegt að fylgjast með því hvaða uppgötvanir verða gerðar í kjölfarið.

Vatn fannst á tunglinu

Þorsteinn Már er Georg Bjarnfreðarson

Þorsteinn Már Baldvinsson segir það misskilning að stjórnendur Glitnis hafi brotið lög þegar þeir veðsettu kvóta íslenskra sjávarútvegsfyrirtækja gegn láni frá evrópska Seðlabankanum. Þessi "misskilningur" er e.t.v. vel við hæfi núna því bráðum hefjast sýningar á Fangavaktinni á Stöð 2, þar sem hinn misskildi Georg Bjarnfreðarson með sínar fimm háskólagráður mun eflaust fara á kostum. Hversu margar háskólagráður ætli Þorsteinn Már hafi?

Segir um misskilning sé að ræða

Stór tala, en... ekki er allt sem sýnist

Samkvæmt skýrslu Sameinuðu þjóðanna eru að minnsta kosti 750.000 barnaníðingar á Internetinu. Áður en lengra er haldið vil ég taka það skýrt fram að ég hef andstyggð á svoleiðislöguðu eins og flest heilbrigt og eðlilegt fólk. Sem stuðningsmaður tjáningarfrelsis get ég þó ekki stillt mig um að vara við þeim áhrifum sem svona fréttaflutningur hefur á þann ágæta málstað. Það eru nefninlega ýmsir valdamiklir aðilar sem hefðu áhuga á að geta ritskoðað Internetið, og fátt þjónar þeim betur til að afla þeirri tilhneigingu fylgis en að birta fyrirsögn með stóra og ógnvekjandi tölu eins og 750.000 í sömu setningunni og orðið "barnaníðingar". Án tölfræðilegs samhengis virðist þetta vera mikið og er þess vegna til þess fallið að vekja sterkar tilfinningar hjá fólki og móta skoðanir þess á þann veg að það styðji frekar skerðingu tjáningarfrelsis. En hvað þýðir þessi tala eiginlega?

Til að horfa aðeins á staðreyndirnar þá skulum við skoða tölfræðina. Miðað við áætlaðan fjölda Internet notenda (>1,6 milljarðar) þá eru þætta færri en einn af hverjum 2.000 notendum. Til samanburðar þá áætlar Scotland Yard að á barnaníðingar á Bretlandi séu fleiri en tíu á hverja 2.000 fullorðna íbúa. Með öðrum orðum má draga þá ályktun að það séu 10 sinnum fleiri barnaníðingar á Bretlandi en á Internetinu í heild, miðað við höfðatölu, en því miður þá hef ég ekki sambærilegar tölur fyrir Ísland. Í tölfræðilegu samhengi virðist því annaðhvort að Internetið sé mun öruggara en raunheimurinn, eða þá að í Bretlandi sé allt vaðandi í barnaníðingum.

Við þurfum að gæta tjáningarfrelsis því það er með því dýrmætasta sem við eigum, dulbúnum árásum á það verður að hrinda af hörku og varast allar blekkingar! Hinsvegar ber að sjálfsögðu að fordæma barnaníð og reyna að koma í veg fyrir, eða refsa mönnum fyrir slíkt athæfi. Samkvæmt ofantöldum niðurstöðum væri rétti staðurinn fyrir löggæsluna til að einbeita sér að ekki Internetið, heldur Bretlandseyjar (og auðvitað önnur lönd með svipað hlutfall barnaníðinga).

750 þúsund níðingar stöðugt á netinu

Fullveldissinnar fagna niðurstöðu ESB-könnunar

Niðurstöður nýjustu ESB-skoðanakönnunar Capacent fyrir SI eru mikið fagnaðarefni fyrir okkur Fullveldissinna. Samkvæmt niðurstöðunum er yfirgnæfandi meirihluti andvígur ESB-aðild, eða 60,6% á móti en aðeins 39,4% fylgjandi af þeim sem tóku afstöðu. Við nánari skoðun kemur einnig í ljós að ívið fleiri eða 43,2% eru mjög eða frekar óánægðir með að nú þegar sé búið að sækja um aðild, en 39,6% mjög eða frekar ánægðir. Sérstaka athygli vekur að þegar spurt er um afstöðu til aðildar í þjóðaratkvæðagreiðslu þá taka þeir sem eru á móti mun eindregnari afstöðu en þeir sem eru fylgjandi, en þegar það er skoðað myndrænt er augljóst að hvaða skoðun fólk hallast frekar:

Til hamingju með þessa niðurstöðu allir þjóðhollir Íslendingar!

P.S. Hvernig ætli niðurstaðan hefði orðið ef spurt væri: "Viltu ganga í ESB og fá Tony Blair sem forseta?"

Fleiri andvígir en hlynntir ESB-aðild

Eva Joly sammála 9 mánaða gömlu bofsi

Í desember síðastliðnum skrifaði ég bofs um fyrirbæri sem kallast Ponzi-svindl, í tengslum við frétt af máli fjársvikarans Bernards Madoff, og líkti svikum hans við erlenda innlánasöfnun íslensku bankanna í aðdraganda hrunsins. Nú hefur kjarnakonan Eva Joly sett fram svipaða samlíkingu eins og þá sem ég setti fram fyrir níu mánuðum síðan. Þessi greining mín varð ekki tilefni til frekari umfjöllunar í fjölmiðlum á sínum tíma en nú þegar Eva segir þetta þá er samlíkingin höfð eftir henni í fyrirsögnum á öllum helstu netmiðlum landsins. Það er greinilega ekki sama hvort er, Jón eða Séra Jón, og augljóst að enginn verður spámaður í sínu heimalandi. Til upprifjunar þá birtist hér á eftir megininnihaldið úr áðurnefndum pistli mínum.

--- bofs 15.12.2008

Ég las að gamni um þetta fyrirbæri sem kallast Ponzi Scheme, en það er ákveðin tegund af fjársvikum. Svindlið gengur út á að safna sífellt meiri innlánum til að standa undir útgreiðslum til annara innlánseigenda eftir að binditíma fyrri fjárfestinga þeirra lýkur. Gjarnan er lofað stuttum binditíma og himinháum vöxtum, sem eiga sér litla stoð í raunveruleikanum því engin verðmætasköpun á sér í raun stað. Rétt eins og í pýramídasvindli er eingöngu verið að færa (sífellt meiri) peninga úr vösum auðtrúa fjárfesta yfir í vasa annara fjárfesta. Þegar hægir á vexti innlána, t.d. þegar markaðurinn er orðinn mettaður, þá myndast misræmi þarna á milli sem ekki er hægt að brúa og spilaborgin hrynur undan eigin þunga.

Það sem sló mig helst við að lesa lýsinguna á þessu er hversu óþyrmilega aðferðafræðin minnir á hina svokölluðu "innlánasöfnun" Kaupþings og Landsbankans í gegnum erlend dótturfélög og útibú. Það skal reyndar tekið fram að ég hef ekki allar forsendur til að leggja fullt mat á það hvort þessi starfsemi hafi í raun verið eintóm svikamylla, eða hvort hún hafi beinlínis stangast á við lög. Hinsvegar finnst mér margt keimlíkt og sem leikmanni þykir það benda til að umrædd starfsemi hafi að minnsta kosti verið glannaleg. Athugasemdir um það eru mjög vel þegnar ef einhver þarna úti er betur að sér í þeim efnum.

Bankahrun líkist máli Madoffs