Stríðsyfirlýsing?!

OMFG! Þetta er slæmt.

Nú dugar ekki bara að setja ríkisstjórnina og seðlabankastjórnina af, heldur verður að ákæra og rétta yfir hinum seku. Samt er hætt við að lítið verði af því á meðan 1/3 af alræðisvaldi yfir fjármálakerfinu er í höndum eiginkonu forseta hæstaréttar. Nú verðum við þegnar þessa lands að fara að taka málin í okkar hendur, annars verður engin sátt um þetta mál nokkurntímann. Ég get ekki betur séð en að Davíð Oddsson hafi málað okkur algerlega út í horn með digurbarkalegum yfirlýsingum sínum í Kastljósinu í gærkvöldi. Viðbrögð Breta koma undirrituð svo sannarlega ekki á óvart, eins og kemur best í ljós á þessari athugasemd minni frá því í gærkvöldi, skömmu eftir að Kastljósi var lokið. Davíð Oddssyni hefur nú aftur upp á eigin spýtur tekist að eyðileggja orðspor, ekki bara Sjálfstæðisflokksins heldur Íslands alls. Svo reynir vesalings maðurinn í nauðvörn að koma sökinni á vin sinn Geir H. Haarde og ríkisstjórn hans, sem hann sagði orðrétt að hefði "Skellt skollaeyrum..." við varnaðarorðum sínum og að það hafi "...víst verið dálítið þannig, já.". (Innan gæsalappa eru beinar tilvitnanir í Davíð sjálfan). Þessir menn hafa nú hver um annan þveran gerst sekir um klúður og landráð af alvarlegustu sort, og beita nú fyrir sig lygum og lýðskrumi á alla kanta til að bjarga eigin skinni. Það er lengi búið að vera augljóst að traust er í lágmarki innan ríkisstjórnarinnar, en nú virðist ástandið orðið alvarlegt innan Flokksins líka og greinilegt að þar ríkir ekkert traust lengur milli aðila sem áður töldust vinir. Við þessar aðstæður gengur ekki annað en að ríkisstjórnin fari frá völdum, hún er orðin algerlega óstarfhæf og með vandræðagangi sínum er hún að stefna okkur út í milliríkjadeilu við rótgróið herveldi, sem meira að segja á harma að hefna við okkur frá fyrri tíð

Mætum öll á Austurvöll kl 12:00 í dag og sýnum viljann í verki. Burt með fasismann úr íslenskum stjórnmálum!

Brown hótar aðgerðum