Stórundarlegt mál

Samkvæmt frétt Morgunblaðsins í dag er haft eftir heimildum blaðsins að Seðlabankinn hafi greitt málskostnað Más Guðmundssonar seðlabankastjóra vegna dómsmáls hans gegn bankanum vegna ágreinings um launakjör. Þar er einnig greint frá því líkt og fram kemur í dómsorði hins umrædda máls nr. 695/2012, að málskostnaður hafi verið felldur niður, sem þýðir að hvor aðili um sig skuli bera sinn eigin kostnað af málarekstrinum.

Þetta er hinsvegar óvenjulegt þar sem Már tapaði málinu, og venjan er að sá sem tapar greiði málskostnað þess sem vinnur í dómsmálum almennt. Frá því eru þó undantekningar, til dæmis hefur stundum verið vikið frá þessu þegar einstaklingar hafa reynt að sækja rétt sinn gagnvart stofnunum ríkisins og beðið lægri hlut. Af texta fréttarinnar er hinsvegar með öllu óljóst hvort að heimild Morgunblaðsins sé vefsíða Hæstaréttar Íslands eða einhver önnur, og er því erfitt að átta sig á því hvað sé átt við í raun og veru.

Er Morgunblaðið að vísa til þess að Már hafi ekki verið dæmdur til greiðslu málskostnaðar mótaðila eins og venja er, og þess vegna hafi Seðlabankinn þurft að bera sinn eigin kostnað af málinu þrátt fyrir að hafa unnið það? Eða er átt við að bankinn hafi hlaupið undir bagga með starfsmanni sínum og lagt að auki út fyrir persónulegum kostnaði Más vegna hans eigin kostnaðar af málaferlunum?

Dómurinn virðist hafa verið skýr um það að hvor um sig ætti að bera sinn hluta kostnaðar vegna málsins. Er Morgunblaðið að gefa í skyn að eftir þessu hafi alls ekki verið farið? Að Seðlabanki Íslands hafi farið þvert gegn dómi Hæstaréttar Íslands?

Það væri þá frétt til næsta bæjar. En því miður er þetta allt of óljóst í fréttinni til að átta sig almennilega á því hvað raunverulega sé uppi á teningnum.

Bankinn greiddi málskostnað Más

Athugasemdir

[Jóhannes Laxdal Baldvinsson, 7.3.2014 kl. 17:07]

Allt er þetta liður í sóknaráætlun ríkisstjórnarinnar, "Már burt".  Og ekki laust við að fingraför Davíðs sjáist á þessari frétt.  Honum er þráseta Más þyrnir í augum.  Már er jú fulltrúi Jóhönnu Sigurðardóttur, handvalinn til að stýra aðlögun Íslands að myntráði ESB

[Bjarni Gunnlaugur (IP-tala skráð) 7.3.2014 kl. 20:34]

Þetta er ágætur punktur hjá þér!

Að það að málskostnaður Más var felldur niður skv. dóminum, þýði að Seðlabankinn, sem væntanlega vann málið gegn Má, þurfi að greiða sinn málskostnað sjálfur.  Þannig mætti segja að Seðlabankinn hafi greitt málskostnað Más!   Þ.e. þann hluta sem að öllu venjulegu hefði fallið á taparann í málinu (Má), hefði dómurinn ekki kveðið á um annað.  

Maður hélt í einfeldni sinni að fréttin segði að Már hefði látið Seðlabankann greiða fyrir sig kostnað Más af málinu! 

Kanski, hugsanlega,mögulega mun hið rétta í málinu koma í ljós á næstunni!

Ég er samt ekki viss að svo verði ;-) 

[Bjarni Gunnlaugur (IP-tala skráð) 7.3.2014 kl. 20:49]

Nei þetta er víst ekkert flókið, Seðlabankinn greiddi bara allan pakkann, skv. Láru V.   Taldi sig þurfa að vita hvað ætti að gera í svona aðstöðu óháð hver væri Seðlabankastjóri hverju sinni. Það má sossum réttlæta það. Maður bíður bara eftir að bankinn snari sér í svipað prófmál varðandi verðtrygginguna.

Lára hefði nú átt að hafa bakgrunnin til þess! 

[Guðmundur Ásgeirsson, 7.3.2014 kl. 21:56]

Já því miður hefur það verið staðfest að Seðló greiddi allan pakkann. Bæði fyrir sig og starfsmann bankans sem höfðaði málið. Þannig virðist bankinn hafa farið þvert gegn dómi Hæstaréttar um að hvor skyldi bera sinn kostnað.

Ég velti því fyrir mér hvort að Hagsmunasamtök heimilanna sem hafa fjármagnað rekstur prófmáls um eitt stærsta málefnið sem heyrir undir starfssvið Seðlabanka Íslands: verðtryggð neytendalán, hljóti ekki í kjölfar þessa fordæmis að senda Seðlabanka Íslands reikning fyrir öllum útlögðum kostnaði vegna þess málarekstrar?

Það er varla síður mikilvægt fyrir bankann að fá úr því skorið...

[Guðmundur Ásgeirsson, 8.3.2014 kl. 19:11]

http://www.visir.is/bankarad-ekki-upplyst-um-malskostnadinn/article/2014140309003

[Guðmundur Ásgeirsson, 14.3.2014 kl. 00:56]

Bankaráð vísar máli Más til Ríkisendurskoðunar

Gerð verði úttekt á greiðslum lögmannsreikninga Más