Nýja Herkvaðningu!

Nýja Herkvaðningin í þessu ímyndar- og efnahagsstríði verður að taka til allra almannatengsla- og auglýsingastofa í landinu, markaðsfræðinga, fjölmiðlafólks, utanríkisþjónustunnar, sem og íslendinga erlendis og þeirra sem hafa tengsl við erlenda aðila. Mikilvægasta hlutverk Íslands í "báráttunni gegn hryðjuverkum" er nú loksins komið í ljós, en það er að berjast gegn hinum raunverulegu hryðjuverkamönnum: UKUSA!

Nú þarf að snúa vörn í sókn og stofna til herferðar á alþjóðavettvangi gegn þeim mannréttindabrotum sem felast í svona ólögum og öðrum hliðum "stríðsins gegn hryðjuverkum", sem er löngu búið að snúast upp í andhverfu sína. Eins og nú er bersýnilega komið á daginn þá stafar alþjóðlegum almannahagsmunum mun meiri ógn af misbeitingu svona víðtækra lagaheimilda, en af þeim fámennu öfgahópum sem upphaflega stóð til að beita þeim gegn. Almenningur hvarvetna þarf að átta sig á því að ef ekki er spornað strax við þessari þróun þá mun það leiða til aukinnar alræðishyggju stjórnvalda og við munum öll enda undir eftirliti Stóra Bróðurs í einhverskonar fangelsi (ekki endilega áþreifanlegu með rimlum og gaddavír, en fangelsi engu að síður).

Athyglin sem þessi ágreiningur okkar og breta hefur fengið skapar einstakt tækifæri, sem er ekki endilega víst að muni gefast aftur ef fram heldur sem horfir, til að koma af stað alþjóðlegri vitundarvakningu um það hversu hættulega braut þetta "hryðjuverkastríð" er komið inn á. Ef ekkert kemur í veg fyrir að svona lögum sé beitt gegn skyrtuklæddu skrifstofufólki frá vinaþjóð, hvað mun þá stoppa þá frá því að koma og sækja þig næst og fjölskyldu þína, og gera eignir ykkar upptækar? Ekki má heldur gleyma þeirri illu meðferð sem jafnvel saklaust fólk í vestrænum ríkjum hefur þurft að sæta í skjóli slíkra laga, án þess að fá einu sinni tækifæri til að halda uppi sjálfsögðum og eðlilegum málsvörnum. Það þarf ekki einungis að draga breta fyrir dómstól vegna efnahagslegra úrlausnarefna er varða skaðabótaskyldu þeirra, heldur líka fyrir mannréttindadómstóla og jafnvel stríðsglæpadómstól þar sem aðgerðir þeirra gegn íslenskum fyrirtækjum eru ekkert annað en þjóðernisofsóknir.

Lengi lifi byltingin!

Gott dæmi um misnotkun laga