Þjóðnýta álverin strax!

Skilum þeim svo einfaldlega um leið og erlend stjórnvöld sjá að sér og "veita okkur líflínu" sem við höfum verið að bíða eftir.

Ransom bitch! ;)

Fleiri hugmyndir til lausnar efnahagsvandanum:

• Tafarlaus úthlutun á auknum fiskveiðikvóta
• Niðurgreiða (í krónum) flugferðir til landsins fyrir erlenda ferðamenn og gjaldeyrinn þeirra
• Stórfellda lækkun stýrivaxta undireins, eða sjá ekki annars allir fram á samdrátt?
• Reka stjórnendur seðlabankans undir eins og gera róttæka uppstokkun á ráðningarferli stjórnenda þangað inn.
• Boða til kosninga svo fljótt sem auðið er og velja nýja ríkisstjórn án þáttöku núverandi stjórnenda, enda væri annað ekki viðeigandi í þessu tilviki frekar en öðrum gjaldþrotamálum!
• Taka strax ákvörðun um framkvæmdir við Sundabraut og tvöföldun Hvalfjarðarganga o.fl. þjóðhagslega hagkvæm verkefni, greitt yrði fyrir í krónum sem gengur ekki á gjaldeyrisforðann og væntingar um aukna þjóðhagslega verðmætasköpun myndu hækka lánshæfismat ríkisins ásamt gengi gjaldmiðilsins.
• Forsætisráðherra talaði um hamfarir, og ef gjaldþrotahrina eða eitthvað slíkt verður til þess að stórir hópar fólks verða heimilislausir, fellur það þá ekki undir verksvið Viðlagasjóðs? Ef einhverntíma er ástæða til að innleysa þann sjóð ætti það að vera á slíkum hamfaratímum.
• Þjóðnýta allt umframmagn húsnæðis sem verktakar hafa í glannaskap sínum hróflað upp í gríð og erg undanfarin misseri. Mig grunar að þar sé hluta skýringanna að leita að þeim skuldahalla sem búið er að hlaða upp og í þeim geira hafi offarirnar verið einna mestar. Íbúðirnar mætti svo nýta sem félagslegt húsnæði og legg ég til að þeim nýrri og veglegri verði úthlutað til venjulegra fjölskyldna sem verða fyrir barðinu á kreppunni, en verktakarnir sjálfir ásamt bankapésunum fái úthlutað eldra félagslegu húsnæði sem þarfnast endurnýjunar. Þeir geta þá gengið í endurnýjun lífdaga á framkvæmdagleði sinni í vissum skilningi með samfélagsþjónustu í stað skuldafangelsis.
• Skoða möguleikann á að þjóðnýta bótasjóði tryggingafélaganna sem eru (voru?) orðnir ansi sverir að mér skilst, en vinsamlegast láta lífeyrissjóðina í friði! Eitt af því sem fjármálaeftirlitið verður að skoða er hvort bótasjóðirnir séu ekki í raun mun stærri en þörf krefur til að standa undir tryggingarekstri, ef svo er væri tilvalið að nota það sem umfram er til að bæta tjón fólks sem lendir í gjaldþroti vegna kreppunnar. Og miðað við hversu samofin tryggingafélögin eru bönkunum þá er engin ástæða til að hlífa þeim eitthvað sérstaklega fyrir hálfgerðu alræðisvaldi FME sem felst í neyðarlögum ríkisstjórnarinnar.
• Afnám verðtryggingar, afturvirkt til 12 mánaða, kæmi sér best fyrir skuldsett heimilin.

(Uppfært og umritað frá frumtexta og e.t.v. á fleira eftir að bætast á listann, sjáum bara til. Og ég sem ætlaði að hætta að blogga... ;)

Víðtækar heimildir til inngripa