Opið bréf til Björns Bjarnasonar

„ Ekki endilega álitshnekkir fyrir Hæstarétt Íslands" [þ.e. að brjóta mannréttindi á veiku ungabarni???!!!]

Björn, þú sýnir það enn með þessum ummælum að þú lifir í einhverjum allt öðrum veruleika en þróast hefur í þessu þjóðfélagi undanfarin ár. Á köflum virðist þú eins og hálfur Bush-isti og hálf-sovéskur í afneitunar og bælingar hugarfari þínu, eiginlega klofinn að hugarfari. Það er því miður farið að koma óorði á annars ágæta stjórnmálahreyfingu að afturhaldsseggir eins og þú fái að sitja óáreittir í valdastöðum "eins og af gömlum vana" sama hvaða vitleysu þeir segja og gera. Meira að segja mogginn þinn gamli vinnuveitandi er farinn að reyna að verja sig fyrir drulluslettunum með því að láta koma skýrt fram að þetta komi frá þér en sé ekki blaðsins. Það sést bersýnilega ef tilvitnanir í þig eru skoðaðar nokkur misseri aftur í tímann. Ég ætla ekki að fara út í persónulegt níð svo lágt leggst ég ekki, en ef þér finnst það "ekki endilega álitshnekkir fyrir hæstarétt" að hafa brotið mannréttindi á veiku barni sem ekki getur borið hönd fyrir höfuð sér, þá er eitthvað mikið að hjá þér og þá er ég að meina í allra besta falli elliglöp! Að mati flestra samflokksmanna þinna er löngu kominn tími fyrir þig að segja af þér og snúa þér að öðrum störfum en pólitík áður en þú veldur meiri skaða og gerir sjálfan þig að enn meira fífli, ef það er þá hægt. Með þessum síðustu ummælum hefurðu sýnt af þér fullkomið vanhæfi til að fara rétt með þá miklu ábyrgð sem embætti þínu fylgir, nú er mál að linni!

-ungur sjálfstæðismaður (og stoltur af því, nema þegar þú opnar á þér þverrifuna Björn)

Björn Bjarnason: „Taka þarf vinnureglur til endurskoðunar"

Athugasemdir

[Guðmundur Ásgeirsson, 7.7.2007 kl. 00:59]

Skrýtið, um leið og ég skráði þetta var fyrirsögn fréttarinnar breytt úr "Björn Bjarnason: "Ekki endilega álitshnekkir fyrir Hæstarétt Íslands" í "Björn Bjarnason: „Taka þarf vinnureglur til endurskoðunar"" sem er óneitanlega mildari setning. Ætli það sé nokkuð slegið á lyklaborðin hjá mbl.is með bláum fingrum sem eru vinveittir Birni? Hvaða skoðun hafa menn annars almennt á svoleiðis "eftiráritskoðun" ég bara spyr?

[Guðmundur Ásgeirsson, 7.7.2007 kl. 01:24]

Nei Jóhann, ég geri mér engar vonir um að Björn hafi manndóm í sér til að svara þessari frekar en annari gagnrýni nema þá í besta falli með skætingi, og það er nákvæmlega það sem ég á við þegar ég kenni hann við Bush-isma og segi að hann valdi ekki lengur þeirri ábyrgð sem á hann er sett. Það hefði verið nær að selja stólinn undan honum heldur en Sturlu fyrir Heilbrigðisráðuneytið.

[Björn Bjarnason (IP-tala skráð) 7.7.2007 kl. 10:22]

Sæll Guðmundur,

 þú ferð mikinn í gagnrýni þinni á mig. Ef þú hlustar á það, sem ég segi í þessari frétt mbl.is sérðu, að þau orð sem sett eru innan gæslappa í fyrirsögn hennar eru einfaldlega röng. Ég sagði þetta ekki, enda hefur vefstjóri mbl. is breytt fyrirsögninni. Ef þú vilt sjá mína skoðun á þessu máli bendi ég þér á að lesa dagbókafærslu á síðu minni bjorn.is. Þú getur agnúast út í mig og skoðanir mínar eins og þú vilt og skreytt þann málflutning með skömmum í minn garð, en að þessu sinni hefur þau hlaupið á þig með því að fara eftir villuljósi á mbl.is.

Með góðri kveðju

Björn Bjarnason

[Jóhann Páll Símonarson, 7.7.2007 kl. 12:46]

Heill og sæll Guðmundur.

Þetta er ekki eðlilegur málflutningur hjá þér varandi Björn Bjarnason okkar góða dómsmálaráðherra sem hefur sannað að hann hefur gert grettistak í öryggismálum þjóðarinnar.

Síðan koma þessar útskýringar þínar á Birni Bjarnasyni sem ég ætla ekki að hafa eftir þér. Þessar lýsingar þínar lýsa þér sjálfum hvernig þú ert og hvernig þér líður.

Blogg skrif þín Guðmundur eru til háborinnar skammar fyrir þig og þína og ekki sæmandi að hvorki þér né neinum að skrifa óhróður um fólk sem þú þekkir ekki.

Sjálfstæðismenn nema þú styðja Björn Bjarnason til góðra verka enda er hann einn af okkar reyndu og traustu ráðherrum með gífurlega reynslu sem þú ættir að kynna þér betur áður enn þú ferð villu vegar í þínum málflutningi.

Jóhann Páll Símonarson.

[Björn Heiðdal, 8.7.2007 kl. 09:26]

Björn Bjarnason er andlegur risi okkar Sjálfstæðismanna.  Hann hefur gert kraftaverk í öryggismálum þjóðarinnar.  Stríðið í Írak og Afganistan eru gott dæmi um það.  Honum stendur ekki á sama um minnstu bræður okkar í þessum tveimur löndum.  Íslenskir friðarhermenn og flugumferðarstjórar með fullar töskur fjár hafa í boði okkar duglega dómsmálaráðherra staðið sig frábærlega.  Án manna eins og Björns væri ekkert fyrir okkar íslensku friðarhermenn að gera.  Við skulum því þakka honum fyrir vel unnin störf en ekki skamma hann eins og þú gerir Guðmundur.

[Jón Sigurgeirsson , 10.7.2007 kl. 15:00]

Björn Bjarnason sagði ekki að málið væri ekki álitshnekkir fyrir HR. Hann sagði að svo þyrfti ekki endilega að vera. Það er álitshnekkir fyrir íslensk stjórnvöld.

Ég hef ekki kynnt mér málið frekar en Björn hafði á þessum tíma. Möguleikinn - að þetta sé ekki álitshnekkir fyrir HR - byggist á því að mannréttindasáttmáli Evrópu hefur ekki stjórnarskrárgildi á Íslandi. Það þýðir að Hæstiréttur og Mannréttindadómstóllinn dæmdu ekki eftir sömu forsendum. Ég geri ráð fyrir að Björn hafi gert þennan fyrirvara á þeim grunni. Hæstiréttur dæmir eftir Íslenskum lögum og ákveðnum fræðilegum aðferðum til að komast að niðurstöðu. Það er hugsanlegt að íslensk lög stangist á við mannréttindasáttmálann að þessu leyti. Til þess að komast að fræðilega réttri niðurstöðu í því máli þarf að leggjast í fræðilega vinnu, sem starfsemenn Björns og hann sjálfur höfðu ekki gert á þessum tímapunkti.

Bent hefur verið á að Réttarfarslög geri ráð fyrir sama hlutleysi eins og ákvæðin sem mannréttindadómstóllinn byggði á. Eins og ég segi: Þetta eru aðeins vangaveltur þar til fræðimenn hafa komist að niðurstöðu.

[Guðmundur Ásgeirsson, 13.7.2007 kl. 12:47]

Athyglisvert að Björn skyldi veita þessum skrifum mínum athygli, ég bjóst svosem ekkert frekar við því fyrirfram, en ef það er rétt sem hann segir að þetta sé ranglega eftir honum haft þá er við engan að sakast um það nema moggavefinn. Eins og fram kom í fyrri athugasemd minni var ég að vísa til þeirrar fyrirsagnar sem upphaflega var á fréttinni en var síðar breytt. Ég vil af þessu tilefni gera alvarlegar athugasemdir við svona vinnubrögð hjá mbl.is sem virðist á stundum ekki taka ábyrga blaðamennsku neitt alltof hátíðlega. Eðlilegra hefði verið að láta upphaflegu fyrirsögnina standa, þar sem margir höfðu þegar tjáð sig um hana, en birta svo leiðréttingu strax og "mistökin" komu í ljós og tengja þá leiðréttingu með áberandi hætti við upphaflegu fréttina. Það að breyta fréttafyrirsögn eftir að hún hefur verið birt opinberlega er auðvitað ekkert annað en sögufölsun sem ég efast stórlega um að standist siðareglur, en að sjálfsögðu ætti það helst ekki að koma niður á Birni sjálfum. Ég dreg því til baka þann hluta skrifa minna sem snúa að því atriði, og bið Björn hér með velvirðingar á að hafa "farið eftir villuljósi" mbl.is eins og hann kemst svo vel að orði. Ég stend engu að síður við gagnrýni mína almennt á þingmanninn og dómsmálaráðherrann Björn Bjarnason, hvað sem einstökum tilvikum eins og þessu líður enda var það aðeins kornið sem fyllti mælinn í mínum huga. Sem dómsmálaráðherra þykir mér hann standa fyrir ýmsa hluti sem eiga ekki við lengur í íslensku samfélagi, ef þeir hafa þá einhverntímann gert það, og veit sem er að ég er alls ekki einn um þá skoðun og því síður meðal hægrimanna. Það eru örugglega líka margir á öndverðum meiði, en Björn er þá ekki fyrstur stjórnmálamanna til að vera umdeildur, líka meðal samflokksmanna sinna.