Öxl er ekki hendi í knattspyrnu

Viðtengd frétt fjallar um athyglisvert mál sem kom í sumar til kasta úrskurðarnefndar vátryggingarmála þar sem var deilt um hvort öxl manns teldist vera hluti handleggsins og þar með útlimur eða hluti af búknum. Eins og háttaði til í málinu hefði trygging mannsins nefnilega aðeins bætt fyrir meiðsli á útlim en ekki búk.

Segja má að viss klofningur hafi orðið í málinu. Ekki innan nefndarinnar heldur í skilningi hennar á sjálfri öxlinni. Nefndinni tókst nefnilega einhvern veginn að kljúfa öxlina í tvo hluta og líta svo á að annar þeirra tilheyrði búknum en hinn handleggnum.

Niðurstaðan varð þó hinum slasaða í hag þar hann hafði einmitt hlotið meiðsli á þeim hluta axlarinnar sem nefndin taldi vera hluta af handleggnum en ekki búknum og honum voru því úrskurðaðar bætur fyrir meiðsli á útlim.

Bótaréttur vegna líkamstjóns er eitt en knattspyrna er annað og þar eru reglurnar um hendi nokkuð skýrar: Handleggurinn byrjar þar sem ermin á leikbúningnum endar sem er klárlega fyrir neðan öxlina. Það er því ekki leikbrot að snerta knöttinn með öxl.

Aftur á móti hafa oft komið upp tilvik þar sem knötturinn hefur lent í upphandleggsvöðva leikmanns og á honum miðjum endar einmitt skyrtuermin (hjá flestum).

Ég vona því að enginn knattspyrnudómari muni lesa þennan úrskurð og fara svo að reyna að sundurliða upphandleggsvöðva leikmanna!

Tilheyrir öxlin handleggnum?