Kýpur tekur upp krónu

Forseti Kýpur, Nicos Anastiades, hefur tekið þá róttæku ákvörðun vegna þess skelfilega ástands sem ríkir í peningamálum eyjarinnar, að rjúfa þing og víkja ríkisstjórn landsins frá störfum. Samkvæmt kýpversku stjórnarskránni er það forsetinn sem fer með löggjafarvald þar til nýtt þing kemur saman, og hefur Anastiades lýst því yfir að í krafti þess taki nú gildi sérstök neyðarlög sem hann hefur sett vegna ástandsins.

Meðal þess sem neyðarlögin fela í sér er lögfesting tvíhliða milliríkjasamnings við Ísland, um gagnkvæma efnahagslega samvinnu og samræmingu í peningamálum, en unnið hefur verið að undirbúningi hans með mikilli leynd að undanförnu og með milligöngu íslenskra viðskiptamanna sem hafa margir viðskiptatengsl frá fyrri tíð við helstu kröfuhafa Kýpur, einkum hina rússnesku. Hluti af björgun fjármálakerfis Kýpur felur í sér að Seðlabanki Íslands mun gerast lánveitandi til þrautavara og veita kýpverskum bönkum fyrirgreiðslu í íslenskum aflandskrónum gegn veði í söfnum útlána til kýpversks almennings.

Þannig verða slegnar tvær flugur í einu höggi, sá vandi sem stafar af svokallaðri snjóhengju umframkróna á Íslandi verður leystur og Kýpverjar klipptir úr snörunni um leið. Búast má við að stækkun myntsvæðis krónunnar muni leiða til þess að talsverður hlutfallslegur samdráttur verði á peningamagni í umferð hér á landi að þessari aðgerð lokinni, sem samkvæmt grunnlögmálum hagfræðinnar mun líklega leiða til tafarlausrar verðhjöðnunar og lækkunar útistandandi verðtryggðra skulda íslenskra heimila.

Einstök efnisatriði samningsins eru enn sem komið er á huldu, en samkvæmt sameiginlegri fréttatilkynningu hefur varðskipið Þór nú þegar verið hlaðið með fullfermi af krónuseðlum og mynt úr hvelfingum Seðlabanka Íslands og siglir á þessari stundu fyrir Garðsskaga á leið sinni til Miðjarðarhafs þar sem ætlunin er að fylla á kýpverska hraðbanka og sjá eyjarskeggjum fyrir nægilegu lausafé. Einnig kemur til greina að veita höfuðborg eyjarinnar Nikósíu, vernd gegn hættu á hafnbanni þar sem sést hefur til rússnesrar freigátu í hefndarhug á sveimi í hafinu umhverfis Kýpur undanfarna daga.

Boðað hefur verið til blaðamannafundar klukkan fimm í dag, samtímis í stjórnarráðinu við Lækjargötu í Reykjavík og í forsetahöllinni á Kýpur (áður húsi breska landstjórans á eynni) þar sem nánar verður skýrt frá efnisatriðum þessa nýja samkomulags, ásamt frekari fyrirætlunum íslenskra stjórnvalda í samvinnu við kýpversk, um stórfelldan útflutning á íslensku leiðinni út úr kreppunni til evrusvæðisins.

Gleðilega páska.

Charlie Sheen farinn frá Íslandi